Бу туhунан, Мииринэй куоратыгар, «АЛРОСА» үлэhиттэрин үгэс буолбут корпоративнай мунньахтарыгар хампаанньа салайааччыта Сергей Иванов биллэрдэ. Бонус, эбэтэр 13-с, 14-с хамнастар - алмаасчыттарга социальнай мэктиэ таhыма үрдүгүн кэрэhиттэрэ. Тохсунньуга, «АЛРОСА» үлэhиттэрин бириэмийэлэрэ, үгэс курдук, «ВТБ24» баанын карточкаларыгар түhээччи.
Холобурдаан эттэххэ, эн, 200 тыhыынча солкуобай хамнастаах буоллаххына, бонус икки ыйдаах хамнаскар холоонноох (400 тыhыынча солкуобай). 13-c хамнаhы сэргэ, 14-c хамнас, рационализатордарга, производство хайысхатыгар ситиhиилээхтэргэ, улахан кэмчилээhини таhаарбыттарга бэриллэр. Онон, бириэмийэ, үлэhит идэтигэр эппиэтинэhиттэн эмиэ быhаччы тутулуктаах. Балтараа сүүс тыhыынча хамнастаах оробуочай, биллэн турар, үлэтигэр эппиэтинэhэ сyрдээх буолуохтаах.
«АЛРОСА» үлэhиттэригэр хамнас үрдээhинэ, дойдуга буола турар инфляция, айан суолун, уматык, бородуукта уонна табаар сыаналара ыарыы туралларын учуоттаан туран, сыныйан суоттанар. Хамнас, хампаанньа бырабылыанньата бигэргэппит кэмигэр үрдэтиллэ турар.
«АЛРОСА» үрдүнэн орто хамнас - 110 тыhыынча солкуобай. Кэнники биэс сыл устата, хамнас, икки бүк yрдээтэ! Саха сирин yгyс тэрилтэлэригэр 13-с хамнас, 14-с хамнас, кыбаартал аайы бириэмийэ, КЛДКнан, эбии харчы бэриллиитэ диэни букатын билбэттэр. «Чыычаах тумсугар холоонноох» хамнаска, дьон суос бэринэн кэбиспиттэр.
Мииринэй алмаасчыттара, Саха сирин атын оройуоннарын кытары холоотоххо быдан ордук хамнаhы аахсаллар. Кылаабынайа, хамнаhы хойутатыы манна ончу суох. Күнүгэр, чааhыгар хамнас түhэр. Алмаасчыттар ботуччу биэнсийэлээх тахсаллар. Профессиональнай ыарыыларын(«Профзаболевание») хамыыhыйа быhaарар түгэнигэр, хас да бүк улахан биэнсийэ ананар.
Эн биэнсийэн дуома, «мунньан-тараан», 13-15 тыhыынча солкубоай эбит тyгэнигэр, «АЛРОСА» биэнсийэтэ – 50, 70 тыhыынча солкуобайтан сыыйа-баайы yрдээн барар. Манна эбэн кэбис, «АЛРОСА» 100 бырыhыан аахсыйалаах, «Алмазная осень» Судаарыстыбаннайа суох пуондаттан эбиилик харчыны.
Эн, «Алмазная осень» пуондатыгар баар уурунуугар 100 тыhыынча угар эбит буоллаххына, хампаанньа тутатына 100 тыhыынча солкуобайы эбии ууран биэрэр. Ити курдук, бэйэтин yлэhиттэригэр, хампаанньа тугу да харыстаабат.
Хампаанньа дохуота кыра, алмааhы Аан дойдуга батарыы далааhына эппиэттээбэт, эбиитин улахан кириисис-буомуруу тyбэлтэтигэр бонус бэриллибэт. Хаппытаал эйгэтигэр соннук кытаанах быраабыла баар. Холобур, биэс сыл аннараа, барыыс 4 эрэ бырыhыан улааппыта. Ол эрэн, «алросалар» бонус ылбатах сыллара диэн суох!
Ити курдук, 2017 сылга диэри, «АЛРОСА» бырабылыанньата, 13-хамнаhы үлэhит булгуччу ылыахтаах диэн быhаарыныыны тутуhан кэллэ.
Станислав Алексеев. Мииринэй куорат.
Слава «Gelio» Степанов хаартыскатыгар алмаас наардыыр сыах үлэhиттэрэ.