"АЛРОСА" yлэhиттэригэр анаан эмтиир киин (медицинский центр "АЛРОСА") 259 yлэhиттээх. Хампаанньа 42 миэстэтигэр эмтэнэр сирдэри (здравпункты) бас билэр.
Эмтиир киин "Горняк" (Мииринэй куорат), "Кедр" (Ленскэй куорат), "Г. Чолбодуков аатынан куруорт (Кэппэндээйи, Сунтаар), "Зарница" (Удачнай куорат) курдук сонотуоруй-профилакторийдардаах. Баларга эмтэммит дьон бу сонотуоруйдар yлэлэрин туhунан сыанабыллара yрдyк.
Холобур, "Горняк" профилакторийы да ыллахха, усулуобуйалара Уhук Илин да Сибиир аар-сааргы аатырбыт сонотуоруйдарыттан туох да атына суох. Манна бааллар: физиотерапия, илбийии, илбийии кириэhилэтэ, "Шарко" дуус, уфо-кислородотерапия, арома-терапия, Алтай, Кэппэндээйи эмтээх кирээстэринэн угуттааhын, астма ыарыылаахтары тууhунан эмтээhин, эмтээх отторунан коктейллар, чэйдэр. Усулуобуйалара аныгы ирдэбилгэ толорутук эппиэттиир.
Эмтиир киин араас ыарыыны-дьайы эрдэттэн сэрэтэр аналлаах тэриэбэлээх ("диагностическое оборудование"). Биллэн турар, сайдыылаах Германия, Япония дойдуларын гиэннэрэ.
Итинник ньыманан, 2017 сыл устатын-туоратын тухары "скрининг" ("screening") ол эбэтэр yлэhиттэр доруобуйаларын сыныйан тургутууну ыыттылар. Манна туох да кyhэйии суох. Доруобуйатынан чэгиэн да киhи саахарын, хаанын баттааhынын, быара-нооро хайдах yлэлиирин сыныйан бэрэбиэркэлэтэр. Босхо. Ыарыыны эрдэттэн дьалбарытыы yлэтэ ("профилактика") диэн бу буолар.
Саха сиригэр yлэлиир промышленнай тэрилтэлэргэ маннык ураты кыhамньыны харахтыы иликпин. "АЛРОСА" эмтиир киинэ, онон, ханнык да промышленнай тэрилтэлэргэ холобур буолар кыахтаах. Манна эмчиттэртэн илбийээччитигэр тиийэ ирдэбил кытаанах. Yрдyк хамнастаах буоланнар, соннук таhаарыылаахтык, хааччыстыбалаахтык yлэлииллэр.
Хас палаата ахсын 20-чэ ханааллаах тэлэбиидэнньэ, wi-fi, спорт тренажерын эгэлгэтэ бааллар. Аhылыктара эрэстэрээн гиэниттэн букатын хаалсыбат.
"Горнякка" кэлэн сынньаммыт Ньурба улууhун бэтэрээннэрэ астынан ахан барбыттара. Аhылыктарын буорсуйата улаханын, эттэрэ, салааттара, фрукталара дэлэйин, минньигэhин биhирээбиттэрэ. Эмтээх ванна, илбийии, физиотерапия ылан, хааннарын ыраастатан, астына фрукта мотуйан, тото-хана аhыы-аhыы саахыматтаан, дуобаттаан, бильярд оонньоон, олус диэн сэргэхсийэн барбыттара. Бу бэтэрээннэр буор-босхо "АЛРОСА" суотугар сынньаммыттара.
Уопсайынан, алмаасчыт маннык профилаторийга сынньанарыгар хайаны-байытар кэмбинээттэр бэркэ yлэлии сылдьаллар.
"Путевкаттан малыйдым, соччото суох сынньанным", - диэччи букатын суох. Дьэ, биир оруннаах ыйытык баар. Холобур, атын сиртэн алмаасчыттарга сыhыана суох киhи, бу маннык далбартан тииhинэр кыахтаах дуо диэн. "Горнякка" билигин хантан да кэл, ким да буол – ааннара тэлэччи.
Дьэ, кyндy табаарыс, арай сыаналарын кыаннаххына эрэ сатанар. Этэргэ дылы, хампаанньа кэммиэрчэскэй тэрилтэ буолан, сыаната ыарахан. Итинэн сэдиптээн, атын тэрилтэлэр, улуустар дьонноругар аналлаах "АЛРОСА" эмтиир киин сыаналара хайдах эбитий диэн токкоолостум.
Онно анаан сыаналарын прейскураанын хайдах баарынан ыйабын.
"Горняк" профилакторийга биир хонук (олорооhун, аhылык, эмтэнии) – 3, 554 солк. (биир хостооххо, люкс). Амбулаторнай эмтэнии, аhылык – 1, 226 солк. "Кедр" профилакторийга (Ленскэй куорат) биир хонук (олорооhун, аhылык, эмтэнии) - 2, 410 солк (биир хостооххо), амбулаторнай эмтэнии, аhылык – 1, 095 солк. "Зарница" профилакторийга (Удачнай куорат): амбулаторнай эмтэнии, аhылык – 2, 469 солк.
Аны, Арассыыйа yрдyнэн аатырбыт Кэппэндээйи сонотуоруйун сыаналарын ылыахха. Кэппэндээйини киhи эрэ барыта ыйытар. Мииринэйдэр, ленскэйдэр, удачнайдар, айхаллар адьас арахпаттар. Кэлэ тураллар.
"Салгына олус ыраас, туустаах yрэх уута эмтээх, бырыылара араас араахыманы, арамачыыhы ылан кэбиhэр" - дииллэр.
Аны билигин, кыайан оҕоломмокко хас эмэ сыл эрэйдэммит дьахталлар кэлэллэр.
"Атын сирдэргэ эмтэнэ сатаан баран кыайан оҕоломмотох уон дьахтартан аҕыhа биhиэхэ эмтэнэн баран ийэ буоллулар!" – диэн миэхэ киэн туттан туран эппитэ Кэппэндээйи сонотуоруйун дириэктэрин солбуйааччыта Лена Семенова.
Кэппэндээйи – кырдьык дьикти сир. Маннык куруортаах буолан алмаасчыттар абыраналлар.
Бастатан туран, "АЛРОСА" хампаанньа тэрилтэтэ буоларын быhыытынан, бэйэтин yлэhиттэригэр чэпчэтиилээх путевкалаах. 21 кyн устата "АЛРОСА" биир yлэhитэ баара эрэ 9, 250 тыhыынча солкуобайга сынньанар, эмтэнэр, кyн устата 4-тэ тото-хана аhыыр. Кэппэндээйи сонотуоруйа алмаасчыттары таhынан атын тэрилтэлэр, улуустар дьоннорун эмиэ сынньатар эбит.
Биир "ноолоохпут". Атын тэрилтэлэр дьонноругар путевка сыаната ыарахан. 21 кyн устата - 46 тыhыынча 520 солк. Ыарахан диир буоллахтарына, "лоскуй-лоскуй" путевка ылар кыах баар. 21 кyнy уhун диир буоллаххына, кыччатан, 6-7 кyн гыныаххын сеп. Биир кyн – 2, 251 солк. (эмтэнии, 4-тэ итии аhылык, толору пансион).
Холобур, сорох дьон, биэс да уон да кyн "курсовка" холкутук ылаллар. Миэстэ эрэ баар буоллун. Улуустар социальнай хааччыйыыларын эйгэтин чэрчитинэн, инбэлииттэри, сэрии уонна yлэ бэтэрээнэрин сынньаталлар.
Билигин кыhын буолан Кэмпэндээйигэ сынньанарга миэстэ дэлэччи баар. Сынньанааччылары "АЛРОСА-Авиа" бэртэлиэттэрэ, чуо Кэппэндээйигэ диэри тиэйэллэр.
Ахсынньы ортотуттан ыла, Мииринэй хайаны-байытар кэмбинээтин "Урал" вахтовката дьону таhыа. Массыына сырыыта муус устар 15 кyнyттэн ыла тохтуур. Бэс ыйын ортотугар понтуон ууруллуор диэри "Ми-8"-нар Кэппэндээйигэ айанныыллар.
Итинэн холобурдаатахха, билигин, "АЛРОСА" yлэhиттэрин сэргэ атын тэрилтэлэр, оройуоннар дьонноро эмиэ эмтиир киининэн туhанар кыахтаннылар.
Станислав Алексеев
Мииринэй куорат
Ааптар хаартыскалара