Мииринэй куоратын библиотекатыгар сyрдээх кэрэхсэбиллээх уус-уран тэрээhин буолан ааста. Аатырбыт алмаасчыт, боростуой силиэсэртэн «АЛРОСА» хампаанньатын вице-бэрисидьиэнигэр тиийэ yyммyт саха дархана, Удачнай ХБК урукку дириэктэрэ Анатолий Попов «Дьылҕабар – махталы кытары» («С благодарностью судьбе») диэн бастакы фолиант-кинигэтин таhаарда.
Бу тyгэни оройуон биир кэрэ-бэлиэ тэрээhининэн аахтылар. Анатолий Попов бэйэтэ да билиммитинэн, киниэхэ – технарьга, уус-уран суруйуу элбэх бириэмэни, сыраны ылар уустук дьарык буолан биэрбит. Манна диэн эттэххэ, Анатолий Попов туохха барытыгар тыыппалаах, талааннаах киhи.
Бастатан туран, спортсмен. Самбо, тустуу – кини эйгэтэ. Анатолий Тарасович – уопуттаах спортсмен-лyөччyк. Спортивнай аалынан, кый ыраах халлаан «иэнигэр», киhи этэ-тириитэ тымныйыах эргиирдэри «кулахачытар» хоббилаах.
Попов – байанайдаах булчут. Ленскэй Орто-Наахаратын, үрэх баhын киhитэ буолан, улахан булду да балыктааhыны баhылаабыт. Дьэ уонна yлэтин чааhынан, «Уо, Анатолий Боппуок дуо?!» диэн наар чиэскэ-бочуокка сылдьыбыт салайааччы.
Анатолий Попов норуот сыанабылынан Удачнай хайаны байытар кэмбинээтин Мииринэй оройуонун ханнык да кэмнэргэ салайбыт дьонтон саамай ытыктаналлара, элбэх ситиhиини тосхоппуттара. «А.Попов – чахчытын алмаас генерала», норуокка чугас киhи.
Олбуор сиппийээччититтэн алмаас хостооччутугар тиийэ итинник санаалаахтар. Удачнай ХБК дириэктэрэ буолаа үрэх баhа дойдутун - Орто-Наахаратын шефтэhиигэ ылбыта, орто оскуола туттарбыта. Элбэх дьону yлэнэн хааччыйбыта.
А.Т. Попов Мииринэй куорат сайдыытыгар сyдy кылааттаах. Мииринэйи кыраhыабай куорат гына туттарбыт улахан салайааччы. Ону, туох кэрэhэлиирин ааттаталыахха.
МПТИ устудьуоннарын 9 этээстээх уопсайа, «Триумф» стадион, «Кимберлит» спорт дыбарыаhа, «Вилюйское кольцо» сынньанар паарка, Ботаническэй саад, «Якутский торговый дом» эргиэн киинэ, бэлииссийэ дьиэтэ уонна уопсайа, үс сулустаах «европейскай» моhуоннарга уларытыллыбыт «Зарница» көстүүнэй, гранит олбохтоох Ленин болуоссата, Ыстаалын бааматынньыктаах Кыайыы буолуоссата, хыраам искибиэрэ, таас СДЮСШОР, «Якутск» УТКЦ, 11-с, 12-с, 13-с «сибиэчикэ» дьиэлэр уо.д.а – барылара кини быhаччы сыратынан ситиhиллибиттэрэ.
Аны билигин, Анатолий Тарасович суруйааччы идэтигэр холонон эрэр эбит. «Дьылҕабар махтанабын» - баай ис хоhоонноох айымньы. Кинигэ «сyрэхтэниитэ» Мииринэй куорат бибилиэтиэкэтигэр ыытылынна. Элбэх ыалдьыт кэллэ. Олор истэригэр – алмаастаах кыраай киинин уопсастыбаннаhа, «АЛРОСА» бэрэстэбиитэллэрэ, оройуон дьаhалтатын yлэhиттэрэ, суруйааччылар, тылбаасчыттар, уус-уран айымньыга холонооччулар, суруналыыстар. Бибилиэтиэкэ yлэhиттэрэ иhирэх киэhэни кыhамньылаахтык ыыттылар.
Сахалыы сиэринэн күндүлээhин бойомнук тосхойдо. Yүттээх хойуу чэйдээх, кофелаах, минньигэс астаах сандалылар тардылыннылар. Бибилиэтиэкэ саалатыгар, ытыктабыллаах киhибит – А.Попов биhирэм киэhэтигэр, дьон астыктык ирэ-хоро кэпсэттилэр.
Мустубут дьону олохтоох эстрада «сулуhа» Роза Роянова уонна эдэр талааннар дууhаны таарыйар намчы ырыаларынан сылаанньыттылар.
Дьон Анатолий Попов yлэтин кэрчиктэрин кэрэhэлиир видеоэрээттэрин, дьиэ кэргэнин хаартыскаларын эгэлгэтин кердyлэр.
Дьоро киэhэ тухары Анатолий Попов табаарыстара тыл эттилэр, санаа атастастылар. Бу кинигэ кэнниттэн, атын үлэлэр эмиэ кэлиэхтэрэ диэн эрэл баар буолла.
Тыл эппит дьон, табаарыстара – бука бары Анатолий Тарасовичка, айар үлэ үктэллэригэр ситиhиилэри баҕардылар, алгыс тылларын эттилэр. Дьэ, ситинник, бэртээхэй диэн, иhирэх киэhэ Мииринэйгэ буолан ааста.
Станислав Алексеев
Мииринэй куорат
Автор фото (на главном) - Сергей Москвитин