ИА «Yakutia24/Якутия24». Саллааттар уонна мотуруостар төрөппүттэрин Кэмитиэтин салайааччыта Мария Емельянова ыам ыйын 28-29 күннэригэр Хабаровскай куоратын аттынааҕы Саха сириттэн элбэх саллаат сулууспалыыр чаастарыгар көрсүһүүлэри тэрийдэ, ол курдук, Князеволконскайга – уопсай войсковой үөрэтэр чааска, Млечникка - мотострелковай чааһыгар, Большой аэродромнайга - салгын күүстэрин чааһыгар уонна Анастасьевкаҕа -танковай чааһыгар. Бу саас, кулун тутар ыйыгар, манна эмиэ Мария Егоровна көҕүлээһининэн саллааттары кытта төрөппүттэр десаннарын көрсүһүүлэрэ буолан ааспыта. Ол курдук ийэлэр чөл олох, сулууспа кэнниттэн үөрэххэ, үлэҕэ киирии туһунан кэпсээбиттэрэ, саллаат аҕата урукку сулууспатын ахтан, бэйэтин сүбэтин-санаатын тириэрдибитэ, маны таһынан, төрөөбүт тылларынан Ийэ туһунан ырыа, олоҥхо, тойук, оһуохай дьиэлэригэр ахтылҕаннарын таһаарбыта. Ол туһунан суруйан турабыт.
Билигин уопсай войсковай үөрэтэр чаастан (Князеволконскайтан) үгүс байыаннай эбээһинэстээхтэр 6 ый байыаннай дьыалаҕа үөрэнэн бараннар араас войсковой чаастарынан тарҕанан салгыы сулууспалыы бардылар. Бу күннэргэ Саха сириттэн сааскы призывынан оҕолор кэлэн сулууспаларын саҕалаатылар. Саҥа ыҥырыллан армияҕа кэлбиттэргэ үтүө-мааны тыллары Мария Егоровна туһаайан эттэ, ол курдук, киэҥ көхсүлээх буолууну, кытаанах санааны, бэйэлэрин көрүнэн, этэҥҥэ биир сылларын сулууспалаан, ытык иэстэрин толорон кэлэллэригэр. “Эр киһи буол, Эр хоһуун буол!” - диэн тылларынан көрсүһүү түмүктэннэ.
Млечникка, Анастасьевкаҕа Ыһыахха эмиэ үгэс курдук Алгыс тыл үтүөтүн, алыптаах оһуохай алгыс тылларын хатылаан Оһуокай дьикти күүһүн уолаттар иҥэриннилэр. Саха былыргыттан күрэстэһэр оонньуутунан мас тардыһыытынан түмүктээтилэр.
Быһаарыы: Саллааттар ийэлэрин тэрээһин мунньаҕын быһаарыытынан, 1991 сыллаахха сэтинньи ыйын 24 күнүгэр Саллааттар уонна мотуруостар төрөппүттэрин Саха Өрөспүүбүлүкэтигэр Кэмитиэтэ тэриллиэҕиттэн номнуо 26 сыл ааста. Бу Кэмитиэт сүрүн сыалынан- соругунан буолар саҥа армияҕа ыҥырыллыбыттарга, байыаннай сулууспалаахтарга, быстах (локальнай) сэрии кыттыылаахтарыгар уонна кинилэр дьиэ кэргэннэрин бырааптарын социальнай уонна правовой өттүнэн көмөлөөх буолууга, эдэр ыччаты патриотическай хайысхалаах иитиигэ, байыаннай сулууспаны үрдүктүк тутууга, сэриигэ өлбүттэр ааттарын үйэтэтиигэ былаас органнарын, общественнай түмсүүлэри кытта бииргэ үлэлээһин.
Маннык аадырыска билсиэххитин сөп:
677000, г. Якутск, ул. Орджоникидзе, 10, офис 200А.
Телефон/факс: 8(4112) 420828
Электронная почта: Этот адрес электронной почты защищён от спам-ботов. У вас должен быть включен JavaScript для просмотра.
Емельянова Мария Егоровна.