Мииринэй хайаны байытар кэмбинээтин дириэктэринэн 2017 сыл күhүнүттэн ылата 2011-2017 сылларга салайбыт Михаил Лопатинскай оннугар Алексей Анатольевич Коваленко ананан үлэлээн эрэр.
Мииринэй ХБК "Мир" руднигын шахтата саахалын иннинэ 2 млн 800 тыhыынча туонна хостуурга эрэх-турах испиттэрэ. Мииринэй ХБКтыгар "Мир" рудник быhылаанын содулугар 3 млн. карааттаах алмаас тосхотор сирэ суох хаалла.
2018 сылга МХБК былаана лаппа уларыйда. Хампаанньа саламтата биллэрбитинэн, "Интернациональнай" рудник "холугар" 540 тыhыынча туонна урууда тула yлэ барара былааннанар. Урукку сылларга манна 500 тыhыынча туонна урууда хостоноро. Быйылгыттан ылата, Мииринэй ХБК хостонор алмаастарын 30 бырыhыанын "Водораздельные галечники" уонна "Иирэлээх" бириискэлэр ылыахтара.
Итинэн холобурдалаатахха, Мииринэй былаhааккатыгар сырье боппуруоhа ыараабыт. Yлэ миэстэтин чааhынан, мин, тохсунньу 15 күнүгэр, Мииринэй ХБКтын эппиэттээх үлэhититтэн ыйыталаспыппар: "Бакаансыйа ончу суох. Штат толору. 300 киhини сарбыйарга күhэлиннибит" диэтэ. Кырдьык, тыhыынчаттан тахса үлэhиттээх "Мир" рудник дьонун, кылгас кэм иhигэр үлэнэн хааччыйыы бэтэрэнэн дьыала буолбатах. Хата, Удачнай хайаны байытар кэмбинээтэ кэскиллээх производстволаах буолан, онно балачча киhи барда.
Ол эрэн, үгүс дьон, Удачнайга, олох-дьаhах усулуобуйата ыараханын этинэллэр.
Станислав Алексеев
Мииринэй куорат