Мииринэйтэн Дьокуускайга диэри айан сыаната – 15 тыhыынча солк. Мииринэйтэн Москуба куоракка диэри 16 тыhыынча солкуобайга айаннатар эриэйсэлэр бааллар. Биэнсийэлээхтэр Москуба диэки айанныылларыгар авибилет - 7.800 солк.
Быйыл Иркутскайга диэри айан сыаната(«Ангара» авиахампаанньа) 50, биэнсийэлээх саастарын туолбут дьахталларга 6 тыhыынча солк. эрэ буолла. Итиннэ холоотоххо, биhиги Сахабыт сирин авиацията, былаас, ыраах Мииринэйгэ олорор дьонноругар тугу тосхотто?! Мэлигир! Дьоллоох Дьокуускайбытыгар «материкка» барар курдук айанныыбыт.
Биэнсийэлээхтэргэ чэпчэтии суох. Саха сирин олохтоохторо буолбатах курдукпут. «Ыалдьар сиртэн илии арахпатын курдук» авиация тарыыптарын бас быстар сыаналарыгар син-биир эргиллэ турабын. Орто, кыра хамнастаах киhи санаммат yлyгэрэ.
2012 сылтан ыла, Иркутскай «Ангара» авиахампаанньата Мииринэйгэ 4.800-5.000 солк. айанната сырытта. Бyрээтийэ дьоно абыраннылар. Дьэ онно биллилэр, авиация тарыыба хайдахтаах курдук чэпчэки буолар эбитин. 2015 сылга «Seven7» Новосибирскай авиахмапаанньата Мииринэйгэ бигэтик кэлбитэ. Бу хампаанньа Краснодарга диэри чэпчэки тарыыбынан «стыковка» онороро былааннанар.
Эhиил саас «КрасАэроавиахампаанньа(Красноярскай) Мииринэйгэ букатыннаахтык киириэ диэтилэр. Итини санаттахха, инникитин, Мииринэйгэ сыбыытыыр авиахампаанньа ахсаана yксyyрэ – олох ирдэбилэ. Оччотугар сыана арыый аматык буолуо диэн эрэл баар.
Аны авиациянан буоста тиэйиитин таарыйыахха. Дьокуускайтан хаhыат тахсыбыт кyнyттэн, арыт биир ый хойутаан кэлэр. Буостаны ыраах улуустарга хаар ньиппиччи сытар кэмигэр ыыттаххына, ардыгар от бытыгыраан эрэ кэмигэр тиийэр. Онно да «баhыыба-махтал». Аны баксаалбыт, пуорпут балаhата. Букатын соччото суох. Мииринэйгэ пуорт балаhата уhатыллыахтаах, тупсарыллыахтаах, аныгы, тупсарыылаах баксаал тутуллуохтаах диэбитттэрэ баара.
«АЛРОСА» МУАД тэрилтэтэ ааспыт биэс сыл устата куппут бетонынан эрэ турар. Кыамматылар. Билигин yп-харчы боппуруоhа кытаатан, ол былаан эмиэ антах анньылынна.
Станислав Алексеев, Мииринэй к.